Esch 2022
Esch 2022
Retour

Suglia Cosimo

Paradoxon Lëtzebuerg

(Dësen Text ass inspiréiert vum Allen Ginsberg senge Howl (1955) an America (1956))

Ech gesinn, wéi déi schlauste Käpp vu menger Generatioun vrecke vu Wansinn, erhéngeren hysteresch plakeg-

an éier dass ech weider maachen an der mech vu Klau beschëllegt;

jo, dat doe war den éischte Vers vum Ginsburg sengem Howl;

well näischt huet sech säitdeem geännert.

Paradoxon Lëtzebuerg.

Lëtzebuerg, mir hunn der alles ginn an elo hu mer näischt.

Lëtzebuerg, 963 Euro 4ten Oktober 2021.

Mäin Kapp deet wéi.

Lëtzebuerg, wéini kommen Ongläichheeten zu Enn?

Géi féck dech mat dengen eidel Verspriechen.

Paradoxon Lëtzebuerg.

Mir danzen duerch d'Dierfer a verloossen

Stroossen, well mer versiche Rou ze fannen

duerch d'Fëmme vun Zigarette gefëllt mat

Haschisch,

mee souguer dat ass eis net gegënnt, well falsch Versprieche

si keng Verbrieche géint de

Vollek a Moral gëtt ersat duerch

Kapital.

Mir drénken deier Drëppen déi eis d'Gehier

duerchenaner geheien an eis Liewer

stierft.

Mir erziele vu verfale Weeër, déi mer net huele wëlle,

mee mussen, well wëll, wäiss Wëllef

entscheede

wat mir solle maachen; hir makaber Muecht

mécht aus eis Raten, déi d'Reschter vun

de Rentner rafen.

 

A soll ech wierklech weider maachen?

A soll ech wierklech weider duerch d'Buch bliedere

vun Ongerechtegkeet déi ons Rescht vun den Deeg

begleet?

A soll ech wierklech no dem Carl Solomon jäizen

dass mir mat him sinn zu

Ettelbréck?

 

Paradoxon Lëtzebuerg.

 

Du denks dech ze héich

butzeg Buerg um Bock

net gezu vun der Stréimung

wéi en Anker deen hänkt.

 

Du bass Festung fir Räicher, 

déi Verméige verstoppen an dengen

Festungsmaueren an du kraz Mënzen

déi vun de Poschen trëllen op.

 

Du luets Leit an däin Haus an

déi Brong priedegen;

selwecht Brong wat s deemools

gefaart has.

 

Du nenns privat Protektioun

deng richteg Ritter a léiss se duerch

d'Gare patrulléiere bis onschëlleg

Bierger:inne Bass vu Déiere kréien.

 

Du sees du akzeptéiert alles a jiddereen

mee bei dräimol Neen!

bass du definitiv dru schold

fir zerstéiert Dreem.

 

An wann ech zeréckdenken

zu eiser Mier-Mamm wonneren

ech mech op se géif kräischen

oder einfach just duerch

d'butzeg Buerg um Bock BIERELEN!

 

Well ech si mer sécher dass den

Drang ze sangen hir

vergaangen ass.

 

Paradoxon Lëtzebuerg

 

Also, Gold-gekréinte Roude Léif

lauschter s de de Kanner no

vun deenen déi dëst gebaut hu

wat s du Doheem nenns?

 

Also, Gold-gekréinte Roude Léif,

mir och nennen dëst eist Doheem

dofir Pléck eis net d'zeideg

Friichte wech vun de Beem.

 

Also, Gold-gekréinte Roude Léif,

bass de sécher dass de

wëlls bléiwe wat s de grad bass?

 

An huel et net béis,

Gold-gekréinte Roude Léif;

Kritik ass en Zeeche vu Léift.

 

Paradoxon Lëtzebuerg...


 




Envoy: 11:20 Mon, 4 October 2021 par: Suglia Cosimo age: 26

  Téléchargement

Suglia Cosimo

Héichuewen; Déifbuedem

Héichuewen;

            Déifbuedem

 

Schwaarze Schnéi fält

            Lavorare! Lavorare! gëtt gejaut

            Metall Schlaange schläife géint Gleis

Schwaarz Eeër am Bauch

 

            Den aarmen Däiwel danzt

 

Héichuewen;

            Déifbuedem

 

Schwiefel Schnéi pifft

            Spalare! Spalare! gëtt gejaut

            Donsteg Drëpsen drëpse géint Stier

Schwiefel Kuel glousen

 

            Den aarmen Däiwel danzt

 

Héichuewen;

            Déifbuedem

 

Schachtschnéi fält

            Più Giù! Più Giù! gëtt gejaut

            Spëtz Piosch pucht géint Mauer

Schachtlift erop an erof

 

            Den aarmen Däiwel danzt

 

Romantesch Gedichter iwwert Héichuewen

                        anersäits 

                                  iwwerschaffen am

                                             Déifbuedem.

 

Den Nuetshimmel ass Rout

Technologie am Tosch

                vu luesem Doud

 

Also nee, Nik a Paul, se si keng Gëtter

       mee,                se sinn Är Opfer.

 

Mëttelmierprolateriat;

            mat all

Mëttel de

            mir hu gëtt vun hinne

                        profitéiert

 

            Den aarmen Däiwel danzt

 

Héichuewen;

            Déifbuedem.


 




Envoy: 19:32 Mon, 11 October 2021 par: Suglia Cosimo age: 26

  Téléchargement